பரத் கிருஷ்ணமாச்சாரி இயக்கத்தில் உருவாகி படம் ‘சுயம்பு’. இப்படத்தில் புகழ்பெற்ற போர்வீரனாக நடிக்க, ஆயுதம் ஏந்துதல், தற்காப்பு கலைகள் மற்றும் குதிரை சவாரி என பலவற்றில் தீவிர பயிற்சி எடுத்து நடித்துள்ளார் நடிகர் நிகில். நம்பமுடியாத போர் காட்சிகளைக் கொண்ட இந்தப் படத்தில் அவரின் சண்டைக் காட்சிகள் நிச்சயம் ரசிகர்களை பிரம்மிக்க வைக்கும் என்கிறார்கள் படக்குழுவினர். மேலும் நடிகர் நிகிலுடன் சேர்ந்து நடிகை சம்யுக்தாவும் சில சண்டைக்காட்சிகளில் நடிக்கவுள்ளார். அதற்காக குதிரையேற்றம் கற்கும் பயணத்தைத் தற்போது தொடங்கியுள்ளார். இதுகுறித்து அவர் கூறியிருப்பதாவது, “எனது அடுத்த படமான ‘சுயம்பு’வுக்காக நான் குதிரை சவாரி கற்றுக் கொண்டிருக்கிறேன். இந்தப் புதுப் பயணம் உற்சாகத்தைக் கொடுத்திருக்கிறது. ஒவ்வொரு நாளும் குதிரையுடன் இணக்கமாக பழகி இந்தப் பயணத்தை கற்று வருகிறேன். இதற்காக ஒரு குழுவாக நாங்கள் ஒன்றாகச் செயல்படுவது அழகாகவும் இருக்கிறது” என்றார்.
பிக்சல் ஸ்டுடியோ சார்பில் தாகூர் மது, புவன் மற்றும் ஸ்ரீகர் ஆகியோர் இணைந்து தயாரிக்கும் இப்படம் சிறந்த தொழில்நுட்பத்தில் பான் இந்தியா படமாக உருவாகிறது. மனோஜ் பரமஹம்சா ஒளிப்பதிவு செய்ய, ரவி பஸ்ரூர் இசையமைக்கிறார். வசனங்களை வாசுதேவ் முனேப்பகரி எழுதியுள்ளார். இப்படத்தின் படப்பிடிப்பு தற்போது ஹைதராபாத்தில் உள்ள பிரமாண்ட செட்டில் நடைபெற்று வருகிறது.
