கடந்த சில தினங்களுக்கு முன்னர் உசிலம்பட்டியில் உள்ள காக்கா முட்டை படத்தின் இயக்குநர் மணிகண்டனுக்கு சொந்தமான வீட்டில் இருந்து ஐந்து சவரன் தங்க நகை, ரூ.1 லட்சம் பணம் மற்றும் அவர் வாங்கிய தேசிய விருது பதக்கங்கள் ஆகியவை கொள்ளையடிக்கப்பட்டன. இதையடுத்து இந்த கொள்ளை சம்பவம் குறித்து போலீசில் புகார் அளிக்கப்பட்ட நிலையில், இதுதொடர்பாக விசாரணையும் நடைபெற்று வந்தது.
இந்நிலையில், இயக்குனர் மணிகண்டன் வீட்டில் இருந்து திருடிய பொருட்களில் இருந்து தேசிய விருது பதக்கத்தை மட்டும் திருப்பி அளித்திருக்கிறது அந்த திருட்டு கும்பல். ஒரு கேரி பையில் தேசிய விருது பதக்கத்தை போட்டு, அதில் ஒரு மன்னிப்பு கடிதத்தையும் வைத்துவிட்டு சென்றிருக்கிறார்கள். அந்த கடிதத்தில் அய்யா எங்களை மன்னித்துவிடுங்கள், உங்கள் உழைப்பு உங்களுக்கு என அவர்கள் எழுதி இருக்கின்றனர். இதை யார் வைத்து சென்றார்கள் என்கிற விசாரணையும் நடைபெற்று வருகிறது.
