புகழ்பெற்ற அரசியல் தலைவர்கள், சினிமா பிரபலங்கள், விளையாட்டு வீரர்கள் பலரின் வாழ்க்கை சினிமா படமாக தொடர்ந்து வெளியாகி வரவேற்பை பெற்று வருகின்றன. இந்நிலையில் பா.ம.க நிறுவனர் டாக்டர் ராமதாஸ் வாழ்க்கையும் படமாக உள்ளதாக தகவல் வெளியாகி உள்ளது. இப்படத்தை இயக்குனர் சேரன் இயக்க உள்ளதாக தெரிவிக்கப்பட்டு உள்ளது. டாக்டர் ராமதாஸ் வாழ்க்கை படத்தில் அவரது இளம் வயது நிகழ்வுகள், டாக்டராக பணி செய்து கொண்டே பின்தங்கிய வன்னிய சமுதாய மக்களின் ஏழ்மை நிலையை அகற்றவும், கல்வி, வேலைவாய்ப்பை உருவாக்கி கொடுக்கவும், தனி ஒதுக்கீடு பெறவும் போராட்டங்கள் நடத்தியது மற்றும் அரசியல் கட்சி தொடங்கியது உள்ளிட்ட பல நிகழ்வுகள் இடம்பெற உள்ளன. இந்த படத்தில் ராமதாஸ் கதாப்பாத்திரத்தில் நடிக்கவுள்ள நடிகர் தேர்வு தற்போது விறுவிறுப்பாக நடைபெறுவதாக தெரிவிக்கப்பட்டு உள்ளது. இதுகுறித்த அதிகாரபூர்வ அறிவிப்பு விரைவில் வெளியாகும் எனவும் கூறப்பட்டு உள்ளது.
