மாயாண்டி குடும்பத்தார் – 2 படத்தின் அதிகாரப்பூர்வ அறிவிப்பு வெளியாகியுள்ளது. மறைந்த இயக்குநர் ராசு மதுரவனின் இயக்கத்தில் கடந்த 2009-ல் வெளியான திரைப்படம் மாயாண்டி குடும்பத்தார். இப்படத்தில் இயக்குநர்களான மணிவண்ணன், சீமான், தருண் கோபி, பொண்வண்ணன் உள்ளிட்டோர் பிரதான கதாபாத்திரத்தில் நடித்திருந்தனர்.
இப்படம் வெளியாகி ரசிகர்கள் மத்தியில் நல்ல வரவேற்பினைப் பெற்றது. தமிழ்நாடு அரசின் சிறந்த திரைப்படத்திற்கான விருதில் 2 ஆம் பரிசை மாயாண்டி குடும்பத்தார் திரைப்படத்துக்கு கிடைத்தது.
இந்நிலையில், மாயாண்டி குடும்பத்தார் படத்தின் இரண்டாம் பாகம் அறிவிப்பு வெளியாகியுள்ளது. இப்படத்தை முதல் பாகத்தை தயாரித்த யுனைடெட் ஆர்ட்ஸ் நிறுவனம் இரண்டாம் பாகத்தை தயாரிக்கிறது.
மாயாண்டி குடும்பத்தார் முதல் பாகத்தில் நடித்த கே.பி. ஜெகன் இப்படத்தை இயக்குகிறார். அரசியலில் சுறுசுறுப்பாக இயங்கி கொண்டிருந்த சீமான், அந்த வேளைகளைகளுக்கு சற்று ஓய்வு கொடுத்து, இப்படத்தில் மீண்டும் நடிகராக களமிறங்குகிறார். இதேபோல் விக்னேஷ் சிவன் இயக்கும் படத்தில் நயன்தாராவுக்கு அப்பாவாகவும் நடிக்கிறார் என்பது குறிப்பிடத்தக்கது.
